Friday, December 21, 2007

...... يا امة المليار




السلام عليكم
ازيكم يا جماعة
كل عام وانتم بخير ويارب دايماً فى صحة وسعادة


كنت قد وعدت بوقف الكتابة فى المدونة الى ما بعد انتهاء الامتحانات
ولكن لم اتمالك نفسى بعد قراءة هذا الخبر فقررت الكتابة
-------------------------------

استيقظت فجراً استعداداً لبدء يوم جديد استعداداً للامتحانات وعقلى مشغول بكيفية تنظيم اليوم وهزاكر ايه الاول
وبعد ان صليت الفجر جلست امام الكومبيوتر للاطلاع على جديد الاخبار قبل المزاكرة كالعادة

فوجدت ما اثار فى نفسى شجون غير طبيعى


جمع من سكان بولندا يقفون امام احدى نقاط الحدود بين بولندا والمانيا فى لحظات ما قبل فتحها

فقد قرر الاتحاد الاوروبى توسيع ما يسمى بفضاء شنجن ليشمل 24 دولة اوروبية

فمن منتصف الليلة الماضية اصبحت هذه ال 24 دولة فى الاتحاد الاوروبى كياناً واحداً


فبعد توحيد العملة
هاهم يفتحون الحدود تماماً والانتقال من بلد الى اخر يتم بالبطاقة فقط دون الحاجة الى جواز السفر
حتى تكتمل الوحدة
والمواطنون يحتفلون بهذا الحدث العظيم

تبادر الى ذهنى بسرعة
طب واحنا ؟؟

فرأيت خبراً اخر فى نفس الموقع يفيد بان اخوانا فى العراق انقسموا ازاء الاحتفال بعيد الاضحى المبارك
فالسنه احتفلوا به فعلا بدءاً من يوم الاربعاء
اما الشيعة فيبدأ العيد عندهم اليوم الجمعة

ناهيك عن الخصومات السياسية المشهورة بين بعض الدول العربية والاسلامية وما حرب الخليج عنا ببعيد
وهالنى ان اعرف ان الحدود بين المغرب والجزائر مغلقة منذ امد طويل


فشعرت بحنين غير طبيعى لسماع النشيد المحبب
يا امة المليار

يا امة المليار هايشق الليل نهار
ويعيد لنا ارضنا ويرجع اللى إنهار

فخرجت الى البلكونة فوجدت الجو بارد جدا والسماء بها غيوم كثيفة
وشردت قليلا
...... فلسطين-العراق-افغانستان-باكستان-لبنان -الصومال-حتى احنا كمان
... فاشتقت الى تلك الايام
.... ايام الناصر وخالد
.... ايام الفاتح

: فوجدت النشيد يقول

من الفرقة الكل ضل
فى البعد ذقنا الذل
وعشان وحدة شعوبنا
اسلامنا هو الحل


مش عارف الحقيقة اهنى اخوانا الاوربيون
ولا اقولهم ان الالة الاستعمارية بتاعتكم زمان فرضت القيود علينا وها انتم الان ترفعوا القيود من عندكم
مش عارف اقول ايه
فقولت يارب
: فوجدت النشيد يقول مرة اخرى

يا امة المليار هايشق الليل نهار
ويعيد لنا ارضنا ويرجع اللى إنهار


فقلت يااااااارب

اسأل الله ان يستخدمنا ولا يستبدلنا
وان يعجل لنا بفجر جديد
ويقر اعيننا بوحده امتنا
ونهضة وعزة بلادنا
-----------------
كان هذا بعض مما شعرت به بعد قراءة الخبر
الساعة دلوقتى 8 و ربع والمفروض ان الريست خلص
والمفروض اقوم عشان اكمل
ادعولى يا جماعة بالله عليكم

ونتقابل بعد الامتحانات ان شاء الله
:)


Mo3Az

Wednesday, December 5, 2007

... فاصل ونواصل




السلام عليكم

ازيكم يا جماعة

يارب تكونوا بخير جميعاً

:)


الوقت خلااااص والامتحانات على الابواب

وعندى امتحان عملى يوم الاحد القادم ان شاء الله

نسألكم الدعاء


ف عذرا هايكون فى فترة توقف فى المدونة

فترة من الامتحانات

فترة من محاولة التركيز

فترة من محاولة ادراك ما فات

فترة من محاولة ارضاء الضمير

فترة احتاج فيها دعاؤكم

ربنا يكرم ويسهل الحال

ونتقابل بعد يوم 20 يناير ان شاء الله

ونقول زى ما الناس بتقول :


فاااصل و نوااصل

:)



Mo3Az

Sunday, November 25, 2007

.... ترك المعاصى





بقالى كام يوم كدة حاسس انى مش مركز و كثيرالسرحان

الى ان استوقفنى الامر امبارح وقعدت اتكلم مع نفسى شوية

انا: مالك ؟... مش مظبوطة ليه ؟... امتحانات السنه النهائية فى المرحلة الجامعية على الابواب

عُرف عنكى الالتزام والتركيز فى مثل هذه الاوقات

ليس هذا من طبعك !!

:(...ما الذى حدث ؟ اخبرينى


سكتت قليلا ، بكت قليلا


انا : مالك بس فى ايه ؟ قوليلى؟

نفسى: انت مش عارف يعنى فى ايه ؟

انا : يعنى حاسس ، بس قوليلى انتى مالك

نفسى: مش عاجبنى حالك وزعلانة منك ، نسيت مقولة الامام الشافعى اللى ياما كنت بتقولها لاصحابك وزمايلك فى الكلية حتى اشتهرت بها بين الناس
نســـــيت ؟!


شكوت الى وكيع سوء حفظى ... فارشدنى الى ترك المعاصى

واخبرنى بأن العلم نور ... ونور الله لا يهدى لعاصى


انا : ااااااااااااااه ، صدقتى يا نفسى

صدقتى والله

صدقت يا سيدى

رحمك الله وجزاك عنا الف خير

نفسى: نسيت ولا ايه ؟

انا : لا والله ما نسيت ، ولكن استذلنى الشيطان

استغفرك ربى واتوب اليك

اعدك يا نفسى بالتغيير

اعدك يا ربى بالتغيير

------------------


كان هذا حوار سريع بينى وبين نفسى ، الى حد كبير بعده عرفت احدد المشكلة

بس ياترى هايكون فعلا فى تغيير ؟؟

ياريت

ادعولى يا جماعة بالله عليكم


Mo3Az

Thursday, November 8, 2007

A beautiful mind




السلام عليكم

ازيكم يا جماعة


من كام يوم كدة واحد صاحبى حكالى عن فيلم


A beautiful mind



اللى بيحكى عن قصه جون ناش عالم الرياضيات الامريكى اللى خد جائزة نوبل 1994


وبيتهيألى انها قصه حقيقية


هو فيلم قديم واتعرض قبل كدة كذا مره


بس انا اللى مش متابع


وبحكم اننا فيزيائيين باه :) فقصة الفيلم شدتنى وحبيت اتفرج عليه


المهم شفت الفيلم وعجبنى اوى بس اكتر حته شدتنى فيه هى اللى فى البدايه خااالص


لما الدكتور كان بيكلمهم اول ما راحوا الجامعة بعد الحرب العالمية التانية

كلامه كان مليان تشجيع وتقدير واحترام للطلبه اللى قاعدين قدامه فقالهم :


mathematicians won the war


mathematicians broke the japanese codes


mathematicians - like you - built the atomic bomb


.....


who among you will be the next Morse ?


the next Einstein ?

Who among you will be the vanguard of democracy,freedom and discovery?


Today we bequeath (نَرِثُ )America's future into your able hands

Gentle men you are welcome here


انظروا ما فى الكلام من تشجيع وتقدير


--------------



المهم بعد ما شفت الفيلم نمت

:) وتانى يوم رحت الكلية الصبح وكل شوية باه افتكر الكلام الجميل اللى فوق

المهم كان عندى سيكشن حضرته


واحنا بنشتغل فى التجربة لاقينا الدكتور دخل ولقى واحد تقريبا بيعمل حاجة فى الجهاز مش عاجباه


طبعا الواد خد اللى فيه النصيب من كلمات الاحترام والتقدير والتشجيع مثل (بطل لعب عيال - ولا انتو فاهمين حاجة اصلا - مالكوش لازمة - والله المفروض نقفلها ما هى مش جايبه همها ....)


لحد كدة عادى بتحصل :) ، بس تقريباً الدكتور خدته الحمية


قعد يقول يابنى الجهاز دا بـــ 12 الف جنيه


ولو باظ مش هانجيب غيره


ولا ليه الجهاز ، يابنى دا لو الفولتميتر(اللى هو احقر جهاز فى المعمل) باظ تبقى مشكلة ومش هانعرف نجيب غيره


اما لو طالب مات نجيب ألف غيره


:) :)


من الاخر يابنى انت وهو جهاز الفولتميتر (اللى هو احقر جهاز فى المعمل برده)احسن منكم


اه والله الدكتور قال كدة


صحيح الدكتور ممكن يكون عنده حق فى بعض الاشياء

ولكن بيتهيألى فى كلام ما يصحش انه يتقال و المفروض يكون الاسلوب غير كده خااالص


-------------------------


كدة كفايه عليكوا وعليا


بس بعد الحكاية دى وبعد وبعد شوية مقارنات ادركت اد ايه فعلاً


احنا بعيــــــــــــد اوووى


واد ايه الفرق كبيـــير اوووى


:( :(

وحسبى الله ونعم الوكيل فى اللى كان السبب



Mo3Az

Monday, October 15, 2007

ان الشيطان ينزغ بينـهم








بسم الله الرحمن الرحيم


"وقل لعبادى يقولوا التى هى احسن ان الشيطان ينزغ بينهم ان الشيطان كان للانسان عدواً مبينا"


كتير بنقابل اشخاص طباعهم حادة او لا يهتمون كثيراً لالفاظهم


فتجدهم يقذفون بالكلمات هكذا دون اى اهتمام او مراعاه لمشاعر الاخرين


وللاسف هذا الاسلوب يولد كثير من الضغائن بين الناس وبعضهم


فتتراكم الكلمات وتتراكم المواقف حتى يمتلىء القدح


وسبحان الله ... فهو العليم بمكنون الصدور وخبايا النفوس


فقال هذه الايه ليخبرنا انه اذا لم نقل التى هى احسن ، فان الشيطان مباشرة يتدخل وينصب شباكه ويوغل الصدور وينزغ بين الاحباب بعضهم بعضا


فنجد اشخاصاً يتربصون ببعضهم البعض وينتظرون الفرص للاقتصاص


وتتحول الحياه عند هؤلاء الى جحيم من التفكير فى كيفية القصاص بل و رد الصاع صاعين


فى حين انه يمكن تفادى الامر من البداية بــــــــ قول التى هى احســـن


----------------------------------------


نـــــــدااااء الى كل من لا يراعى ألفاظه


بالله عليك فكر جيداً قبل قول اى لفظ قد يسىء الى اخيك او يجرح مشاعره


ولنعامل الناس كما نحب ان يعاملنا الناس


فوالله لا يؤمن احدكم حتى يحب لاخيه ما يحب لنفسه


ولنتذكر دائماً قول المصطفى صلى الله عليه وسلم


"طوبى لمن ألان الكلام "



Mo3Az

Thursday, October 11, 2007

اياماً معـدودات

















...هكذا مر رمضان

...وهكذا سيمر العام

...وبالمثل سيمضى العمر



....وكأنه لحظات



--------------------------------------------



مضى رمضان



ولكن الله يناديك


فلا ترد نداه


فرب رمضان هو رب كل الشهور



اللهم ايقظنا لتدارك بقايا الاعمار


وأعنا على بذل الخير


والاستكثار منه

Thursday, October 4, 2007

شد المئزر

السلام عليكم


ازيكم يا جماعه


فى البداية احب اشكر كل اللى شجعونى بعد انشاء المدونة اما بابداء الرأى او بالتعليق ، بجد متشكر اوى

وان شاء الله اكون عند حسن ظن الجميع


:d :)

-----------------------------------------




الموضوع



رمضان عدى بسرعة اوى يا جماعة وبقينا فى العشرة الاواخر اللى ربنا اقسم بيهم
وقال ... وليال عشر


عشرة ايام يحملوا فى طياتهم العتق من النيران والفوز بالجنان ...يا الله

(اللهم اعتقنا من النار ... امين )


وكان النبى صلى الله عليه وسلم اذا دخل العشر شد المئزر وايقظ اهله واقام الليل


عشر ليالى بينهم ليله خير من الف شهر من حُرم اجرها فقد حُرم


ولو قعدنا نتكلم عن فضل العشر وفضل ليله القدر مش هانخلص ولكنها تذكرة وذكر فان الذكرى تنفع المؤمنين



اوصي نفسى وحضراتكم بالاخذ بالعزيمة واغتنام الوقت والاكثار من الدعاء فى السجود والاكثار من قول اللهم انك عفو تحب العفو فاعفوا عنا

بس كدة دا اللى حبيت اقوله : )


-------------------------------------------


فاصل ونواصل : )

ونتقابل بعد رمضان ان شاء الله


Mo3Az

Monday, October 1, 2007

بسم الله



















السلام عليكم


ازيكم يا جماعة


نقدم لحضراتكم ...بحب النــــور


:)




الحقيقة وبعد تفكير عميق وايماناً بفكرة المدونات ودورها المؤثر فى تنمية الفرد والمجتع لقيت نفسى بعمل المدونة دى .




مش عارف بصراحة الوقت والدراسة والظروف هايسيبونى اعرف اكمل فيها ولا لا ، بس انا فجأه حسيت انى محتاج اعمل المدونة دى اوى وحسيت كمان انى عايز اتكلم واكتب واعبر واشارك الناس والناس يشاركونى فى اهتماماتى وتأملاتى ، افكارى وتطلعاتى



بحب النـــور



هتكون ان شاء الله عباره عن يوميات - مواقف و احداث- خواطر وتأملات - نرصد فيها سوياً بعض المشاكل (فردية او اجتماعية) - نتواصل و نتبادل الخبرات وحاجات تانية ان شاء الله



اتمنى ان الغرض منها يتحقق وان محدش يزهق منى



اما بخصوص بحب النــــور ، فهى تعبر عنى وعنك وعن ناس كتير



تعبر عن مجتمع بأكمله بيحب النور وبيحلم بيه


و


دلوقتى



تعاااااااااالوا بينا نحب النور مع بعض ونحلم بيه هنا



Mo3Az

 

Counter From POQbum .com