Monday, September 15, 2008

عدنا



السلام عليكم
كل عام وانتم بخير
كل عام وانتم الى الله اقرب وعلى طاعته ادوم

بقالى كتير ما جيتش هنا
وقبل ما اقول اى حاجة لازم اشكر السادة الافاضل اللى علقوا على البوست الاخير
وكمان الناس اللى كانت بتيجى المدونة وانا مش موجود على حسب ما عمو الكاونتر بيقول
:)

حصل حاجات كتير نوعا فى الفترة اللى فاتت
نتيجتى بانت-

اتخرجت الحمد لله-
طلعت التالت-
وجبت جيد جدا مرتبه شرف الحمد لله-
مازلت على باب الله ، وان كان فى محاولات كدة ادعولى ان ربنا يقدر لى الخير حيث كان-
قدمت تمهيدى فى الكلية-

كنت مريض شوية-
واضح ان آلام المرض كانت تحبنى بشدة
لطالما اخبرتها اننى لا احبها ، وان العلاقة اللى تجمعنا هى مجرد حب من طرف واحد
وان العلاقات من هذا النوع يكون محكوم عليها دائما بالفشل
الا انها ظلت متمسكة بى لفترة ليست بالقليلة (الحب مقطع بعضه) ، وان كانت زعلت منى لانى قاسى عليها شوية
فبقالها يجى اسبوعين او اكتر تقريبا ما سألتش فيا
وانا بدورى كنت كريما معها فدعوت لها بالتوفيق من غيرى وان كل شىء قسمة ونصيب
:)

همممم
فى حاجات كتير حصلت الفترة اللى فاتت دى
مش عارف اكتب ايه دلوقتى الحقيقة
بس على العموم انا قلت ادخل دلوقتى اشقر على المدونة وانضفها من خيوط العناكب اللى انتشرت فى اعلى الشاشة واسفلها

واقول :
"عدنا "

وعلى امل الكتابه فى وقت قريب ان شاء الله
تانى كل عام وانتم بخير
سلااام

Friday, July 4, 2008

وداعاً ايها العالم الجليل



سبحان الله
هل هى الميتا فيزيكس التى جعلتنى اشعر بذلك قبل اسبوع
وتحديدا يوم الخميس الماضى؟؟
ام انها مجرد صدفة كما يقولون( اعترض على كلمة صدفة لان كل شىء مقدور)؟؟

حقيقة لا ادرى
ولكنه شىء عجيب فعلا
كَوْنى اجد صفحة الدكتور المسيرى على الفيس بوك يوم الخميس الماضى فسارعت بالاشتراك فيها
ولكنى توقفت قليلا مع الصورة الموجوده هناك والتى هى موجودة فى بداية التدوينة
لافكر قليلا
اشعر بانقباض من تلك الصورة
هل هى لشخص قد مات ؟؟
هل مات الدكتور ؟؟
هل سيموت الدكتور قريبا؟؟

بالطبع سرعان ما جاء الجواب من داخلى
فال الله ولا فالك يا شيخ
بلاش قر
ربنا يبارك فيه وفى عمره ويمتعه بالصحة

ومضت الايام حتى كان الامس
يوم الخميس 3 يوليو
وتماماً بعد اسبوع من تلك الواقعة
لاستيقظ على خبر موت الدكتور
وانا لله وانا اليه راجعون

للاسف لم اتعرف على عبقرية الدكتور قديما
ولكن معرفتى به وليدة الاشهر الماضية
انبهرت بتحليلاته المتميزة
وموسوعيته المتفرده
وخبرته العميقة بخبايا دولة الاحتلال البغيضة
ندمت كثيرا لانى لم اطلع على هذه العبقرية الفذه من قبل
ولكن عزائى ان ميراثه عظيم
وان الوقت لم يفت للاطلاع عليه
ان شاء الله

سيدى الدكتور
رحمك الله
وجزاك عنا وعن الاسلام وقضيته خير الجزاء
وتقبلك الله فى عباده الصالحين
واجزل لك الخير والثواب
انه القادر على ذلك


واليكم انقل احدى روائع الدكتور تخليدا لذكراه
حلقة بلا حدود مع احمد منصور
يتوقع فيها الدكتور قرب زوال دولة الاحتلال
نتيجة لدراساته المستفيضة
والاحصائات الواقعية المنشورة
دمت فى قلوبنا وعقولنا يا دكتور
(F)



Monday, June 30, 2008

فرمااان فيزيائى


كنت بقلب فى المدونة
لقيت ان مفيش ولا موضوع عن الفيزياء هنا من اول ما بدأت اكتب
طب بالله عليكو مش عيب عليا
وانا راجل بكالوريوس علوم فيزياء اد الدنيا كدة
انى ما اكتبش حاجة خالص عن الفيزياء
ولا ايه رأيكووا؟؟
:)

: لذلك اتخذنا نحن الفرمااان التالى

:)" انى اكتب تحت بند " اديها فيزياء اديها
ماشى الحال ؟؟
بلاش ضرب عشان خاطرى
:)

على العموم انا هحاول انى اكتب – على أدى كدة – بشكل مبسط ان شاء الله
بدون دخول فى التفاصيل
عن اهمية الفيزياء فى حياتنا وازاى انها بتفسر كتير من الحاجات اللى حوالينا
و اد ايه بجد الفيزياء ممتعة
وان شاء الله هنستطعمها مع بعض
:)

انا مش هكتب حاجة النهارده
هستنى اشوف رأيكم الاول
فى الفرمااان الخطيييير دا
;)

مع الاخذ فى الاعتبار انى هكتب هكتب
شئتم ام ابيتم
دا فرمااان يا جدعان مش اى كلام
:D

يلا مستنى رأيكم
سلااام

Friday, June 13, 2008

اخر جمعة


لطالما كنت اقولها
طوال الاربع سنوات الماضية
فى ايام الامتحانات
لسه جمعتين
لسه جمعة
واخد الاجازة
:)

وها قد حان الوقت لكى اقولها بكل ثقة
انها حقا
"اخر جمعة"
فى التعليم الجامعى بالنسبة لى
اخر امتحان بكرة
مناقشة مشروع التخرج
ودا يعتبر امتحان سهل بشكل كبير مقارنة بباقى الامتحانات
ولذلك عمليا اخر امتحان كان المادة اللى فاتت

شعور غريب ذلك الذى انتابنى بعده
عندما ذهبت لاصلى الظهر فى مسجد الكلية بعد الامتحان
وكأن الذكريات كلها من اول يوم فى الكلية تعرض على ذهنى فى نفس اللحظة
وكأنه شريط فيديو

نعم
كنا نجلس هنا
نقرأ القرآن هنا
نستريح بين المحاضرات هنا
افطارات رمضان ايضا كانت هنا
اتذكر اول افطار رمضانى لي فى الكلية
اذكر جيدا تلك الرعشة التى انتابتنى عندما انشدنا "مؤامرة تدور على الشباب " معاً ، وكأنها كانت بالامس
اشعر بقلبى يخفق بشدة

لم اخذ راحتى فى النوم ليله امس
كانت مادة صعبه
حاولت ان ابذل كل ما فى وسعى لمذاكرتها
وكأنها مذاكرة الوداع
:)

اشعر بالتعب فعلا
مددت ظهرى على الارض لاريحه
فوجدت نفسى اتأمل السقف
يااااااااااااااه
!! اعشق تلك النجفة الازلية التى تدلى من سقف المسجد
!! وهذه العناكب التى نسجت خيوطها ببراعه ، اعشقها ايضا
ما هذه الاشياء العجيبة
هل من الطبيعى ان اتعلق بمثل تلك الاشياء

هل يجب ان افرح لانى سأكون فى عداد الخريجين ، لانى فى طريقى إلى تحمل مسؤليات نفسى بشكل كامل
أم يجب ان احزن لفراق الاحبه
هل ستستمر هذه الصداقات وهذه العلاقات الانسانية الجميلة فى مراحل العمر التاليه
ام ان الحياه العملية اقوى
الكثير يدور فى الذهن

انا بكتب وانا مش منظم كلامى
ولكن دلوقتى عايز اقول
احبك كثيراً يا كليتى
احبكم كثيراً يا اخوانى
احبكم كثيراً يا اصحابى

: يتردد الحديث الشريف فى اذنى الان بشده
" احبب ما شئت فإنك مفارقه "

الاسبوع القادم هو اسبوع المناقشة
من السبت الى الخميس
مجموعتى يوم السبت
باقى المجموعات متوزعين على باقى الايام
اعتقد انى سأكون فى الكلية كل يوم فى الاسبوع القادم
:)

...ولكنها تبقى
"اخر جمعة"

للحديث بقية
ان شاء الله
اشوفكم بعد الامتحان
سلاااام

Sunday, May 4, 2008

عندما هجم السرور علىْ



لقد هجم السرور علىْ
هكذا قال سامى
وكذلك اقول انا ايضا
والله لقد هجم السرور علىْ عندما علمت بنبأ الافراج عنك يا سامى
اعتقد انه ليس هناك كلام بعد كلام سامى
تقبل الله منك يا سامى
وأعاد اليك بقدرته صحتك وعافيتك
حمدلله على السلامة
:)

Wednesday, April 16, 2008

حبايبنا يا غايبين عن عينا..فى السجن بعيد لكن بينا

لانهم صدعوا بالحق
لانهم قالوها بصوت عالى
لانهم طالبوا بالاصلاح واطلاق الحريات
لانهم اصحاب مبدا ومتمسكون بهويتهم الاسلامية
ولانهم لم يسرقوا ولم يهربوا ولم ينهبوا ولم يسمموا
ولانهم نالوا احكاما بالبراءة من القضاء المدنى الطبيعى
فتم تحويلهم للمحكمة العسكرية بالرغم من كونهم مدنيين

ولان الظلمة يكرهون العدل كما يكرهون النجاح
اصدروا احكامهم
الظالمة
على الشرفاء
وما نقموا منهم إلا أن يؤمنوا بالله العزيز الحميد
وحكموا زوراً ببراءة هانى سرور عضو مجلس الشعب عن الحزب الوطنى
وصاحب اكياس الدم الملوثة
وما يخفى على الله من شيء في الأرض ولا في السماء

ايها الظلمة
لكم من الله ما تستحقون
يوم تشخص ابصاركم باذن الله
فموعدنا يومها
يوم تبيض وجوه وتسود وجوه
باذن الله

ايها الشرفاء
قال رسول الله صلى الله عليه وسلم
عجبا لأمر المؤمن إن أمره كله خير ، وليس ذاك لأحد إلا للمؤمن ؛ إن أصابته سرّاء شكر ؛ فكان خيراً له ، وإن أصابته ضرّاء صبر ؛ فكان خيراً له
هنيئا لكم مغفرة الله
باذن الله
وحسبنا الله ونعم الوكيل










Sunday, April 13, 2008

محاولة واعتذار


اذا كنت من هؤلاء الذين ذاقوا الامرين معى
او كنت من هؤلاء الذين لم يتعاملوا معى كثيرا ، فلم يضجروا منى بعد
:) او حتى ان كنت لم تتعامل معى بعد ، او بمعنى اصح لسه ما اتقرصتش
مش مهم تكون اى حاجة فيهم

المهم ان انا هتكلم معاك دلوقتى شوية بخصوص حاجة من اكتر الحاجات اللى عملالى مشكلة فى حياتى
تلك العادة السيئة التى اثرت عليا كثيرا
وهى
عدم الالتزام بالمواعيد
: واللى كما يصفها استاذ عبد الوهاب مطاوع بقوله
فأنا من هؤلاء الذين لا يلحقون القطار... الا وهو يتحرك دائماً ، اى انى اصل غالبا الى موعدى والى العمل المطلوب منى فى اللحظة الاخيرة وكثيراً * بعدها ... وهذه الآفه كلفتنى الكثير فى مراحل عمرى المختلفة

لما قريت الكلمتين دول لاستاذ عبد الوهاب حسيت انه زى ما يكون بيتكلم عنى بجد
فلست فى حاجة لان احكى لكم كمية المواقف المحرجة اللى تعرضت لها بسبب تأخرى على مواعيدى
ولست ايضا مضطرا لان اخبركم بعدد الاشخاص الذين خسرتهم او كدت بسبب تلك العاده الذميمه
وكذلك لست مضطرا لاخباركم بكمية العهود والوعود التى اخذتها على نفسى ومع من حولى لمحاوله التغيير
لست مضطرا لذلك كله

ولكن اللى انا مضطر اعمله هو انى فعلا احاول اتغير
شايفك ياللى بتضحك
وسامعك كمان وانت بتقول سمعنا الكلام دا كتير قبل كدة
:@

بس حصل موقف ظريف امبارح خلانى متفائل شوية
كان معاد المحاضرة الساعة 8 الصبح
انا كنت صريح مع نفسى وقلت انا كل اللى عايزه انى احدد معاد اكون موجود فى الكلية فيه حتى لو بعد 8 ، بس المهم ان المعاد اللى اقوله التزم بيه . وقلت انا لازم اكون هناك الساعة 8 وربع
وحددت ربع ساعة للفطار وربع ساعة للبس وتجهيز حاجتى وربع ساعة كمان للطريق
وفعلا وصلت الكلية الساعة 8 وربع
كنت فرحان جداااااااا وفخور اوى بنفسى
وكمان اللى زود فرحتى ، انى لقيت الدكتور لسه ما جاش
:) حسيت بالزهو اكتر واكتر
ابص فى الساعة الاقيها 8 وتلت والدكتور لسه ما جاش
عادى
8 ونص والدكتور مجاش
9 الا ربع المحاضرة اتلغت
هههههههههههههه
دا جزاء اللى يروح بدرى اصلا
:D

بغض النظر عن كدة
لكن انا بجد عايز اتغير وهحاول ان شاء الله مع نفسى شوية شوية
وكلى ثقة بانى ساصل الى هدفى وهو الالتزام بالمواعيد بعد مزيد من المحاولة والاجتهاد

وكمان عايز اقول لاول صنف من اللى قلت عليهم فى البوست
اللى هما الناس اللى ذاقوا الامرين معى
معلش
بجد معلش انى تعبتكم معايا كدة
بس والله ما كانش بمزاجى ، صحيح كانت محاولاتى لاصلاح نفسى ضئيلة نوعا
ولكن دايما كنت ببقى نفسى التزم بالمعاد
اقدم لكم اعتذارى
فاقبلوه
(F)

: ولنفسى اقول
قال الامام الحسن البصري رضي الله عنه: من كان يومه كأمسه فهو مغبون، ومن كان يومه شرا من أمسه فهو ملعون

بس كدة
:)
-------------
استاذ عبد الوهاب مطاوع قال احيانا *
اما انا فأقول كثيرا

Thursday, April 10, 2008

ارمى الماضى اللى يغيظ



كنت قاعد مع نفسى شوية فافتكرت بعض المواقف الغير جيده اللى حصلت معايا قبل كدة

فإنتابتنى حاله مزاجية غير طيبة

ولكن سرعان ما تذكرت تلك الحكمة الخالده

ارمى الماضى اللى يغيظ ... انساه والمستقبل اديه كل التركيز

ودا فعلا الحل لحالتى دى

:) فحبيت انقل لكوا الحكمة لتتعلموا معى من استاذ تيمون وبومبا

ودلوقتى اسيبكوا تتفرجوا

قصدى

تتعلموا

:)

Friday, March 28, 2008

هتوحشنى يا صاحبى




زى النهاردة ... من اسبوع فات
كنا فى ماتش كورة مع بعض

لكن النهارده ...وكمان دلوقتى
هو فى مكة بيعمل عمرة

عبد الحى
صاحبى واخويا واستاذى وحبيبى
سافر الاسبوع اللى فات للعمل فى وظيفة افضل من تلك التى كانت هنا زى كتير من شباب بلدنا
بس هو مختلف كثيرا

راجل بجد فى المواقف الصعبه
يحسسك فعلا بولاد البلد الجدعان
مزيج جميل من الجدية والعاطفة
بيقول اللى هو شايفه صح قدام اى حد ، فعلا لا يخشى فى الحق لومة لائم .ربنا يبارك فيه
يحسن السماع الى الاخرين ، وبعد ان تفرغ من كلامك تسمع رأى رجل فى الاربعين مع انه لسه فى منتصف العشرينات

افتكر موقف ليا معاه
فى احد المرات كنت قاعد انا وهو ومجموعة من شباب المسجد
فطلب مننا خاطرة عن احدى الايات القرانية ،وزيادة فى التسهيل علينا قال على ان يكون زمن الخاطرة لا يتجاوز نص دقيقة (المفروض ان اى شوية كلام جمب بعضهم كدة يعدوا نص دقيقة من بدرى يعنى) ، فلم نستطيع
:)
طلب منا ان نجهز خاطرة طوال الاسبوع عشان نقولها الاسبوع الجاى ولو زادت عن نص دقيقة هو اللى هيسكتنى
برده لم نجهزها
:$

وبعد 3 شهور من علاقتنا بيه
وبرده فى مثل تلك الجلسة الربانية
لقينا كل واحد فينا قاعد يقول خاطرة ولا 10 دقايق ، وكلام باه ماشاء الله
فضحك هو
وقال فاكرين خاطرة النص دقيقة يا ولاد الذين
هههههههه

ايوه فاكر
ومش هنسى
....... يا
بوص
:)

ربنا يوفقك يارب
وإلى لقاء باذن الله
Mo3Az

Tuesday, March 25, 2008

قتل اصحاب الاخدود



النهارده ... الحكم فى المهزلة العسكرية
لشرفاء الاخوان

النهارده ... احب اقول
قـتل اصحاب الاخدود

آبائى
لن يضيعكم الله

Sunday, March 2, 2008

!!!.... بتوع تجارة هما السبب اصلا


لاننا فى بلد غير كل البلاد
ولان الوضع عندنا يختلف عن اى وضع
ولاننا فى انطلاقتنا الجديدة نحو المستقبل
ولان بلادنا بتتنيل بيهم
لكل ذلك
عادى جدا انك تقرا الخبر اللى هكتبه دلوقتى

قام طلاب الاخوان المسلمين فى كليه العلوم جامعة المنصورة باقامة معرض فنى فى الاسبوع الماضى يتناول الحصار المفروض على قطاع غزة ويتناول ايضا المحاكمات العسكرية فى مصر
ونتيجة طبيعية لهذا المعرض الخطير وكتهمة اساسية لهم ، تم فصل 6 طلاب من كليه التجارة
ايوووووووه كلية تجارة

.... ايه

مستغرب ليه
غريبة اوى يعنى !؟؟
لا يا حبيبى عادى جدا ، وبتحصل فى احسن العائلات كمان
وبتوع تجارة اصلا هما السبب ، ولو فعلا مالهومش دعوة بمعرض كليه علوم
يبقوا يورونا باه ازاى يثبتوا انهم مش طلبه فى كليه تجارة لو جدعان
:)

والله شر البلية ما يضحك
اقرا الخبر هنا

Thursday, February 28, 2008

كم انت كبير يا ابن الصحراء



كنت اتسكع فى طرقات الانترنت :) ، فقادتنى كيبوردى وماوسى الى ذلك الفيديو من يوتيوب
فيديو لحبيب قلبى زيزو بتعليق الرائع عصام الشوالى
فتذكرت بعض المشاعر التى اكنها لذلك المايسترو
واستحضرت
اجتهاده
مهارته الغير مسبوقه
اخلاقة المثاليه
مشواره الطويل مع الفن والهندسه والانجازات
واخيراً ، عزة نفسه وكرامته لما ماتيرازى تطاول عليه وعلى شرفه فى نهائى كأس العالم بين فرنسا وايطاليا فضربه زيدان دون الالتفات الى انه فى نهائى ومن غير اى حسابات

حقا كم انت كبير يا ابن الصحراء
:)
ودلوقتى اسيبكوا مع الفيديو

Monday, February 25, 2008

رسالة



غدا 26 فبرايرهو يوم النطق بالحكم فى المحكمة العسكرية
تلك المحكمة الظالمة التى يحاكم فيها العلماء واساتذه الجامعات ورجال الاعمال من الاخوان المسلمين وعلى رأسهم المهندس خيرت الشاطر نائب المرشد العام ، مع العلم ان هؤلاء الشرفاء من الاخوان نالوا حكماً بالبراءة والافراج الفورى من قبل 4 مرات من القضاء المدنى الطبيعى ، ولكن رفض الظالمون كل ما له علاقة بالعدل فامتنعوا عن تنفيذ احكام القضاء واقاموا تلك المحكمة العسكرية الهزليه للنيل من الشرفاء بل وسرقوا اموالهم وشركاتهم وخزنة الاستاذ حسن مالك التى سجلت فى الاحراز ثم اختفت خير دليل
افسدوا ابحاث العالم الدكتور خالد عودة العلمية بعد ان خاف الفريق البحثى العالمى الذى يرأسه الدكتور وغادر مصر بعد اعتقال الدكتور


فاجتمع الحقد الاعمى على كل ناجح مع الحرص على الكرسى ومحاولة ابعاد كل من يحاول الاصلاح
وكأنه قدر مصر منذ القدم ان يسجن كل شريف او مطالب بالاصلاح
فما نسينا قصة سيدنا يوسف ولا سيدنا موسى عليهم السلام
سجن الاول على الرغم من معرفة عزيز مصر بشرفه وطيب اخلاقه ، وهدد الثانى بالسجن ان لم ينتهى عن محاولات الاصلاح المتكررة

على اى حال احب فى هذا اليوم ان اوجه بعض الرساائل الى من يهمه الامر
:الى كل من

1-القاضى

إعلم أن لك موعداً لن تُخلفه وأن لك مع الله وقفة يحاسبك فيها على كل صغيرة وكبيرة
يوم تبدل الارض غير الارض والسماوات وبرزوا لله الواحد القهار

سيدى القاضى ، ان كنت تنوى ان تبيع اخرتك ارضاء لرئيسك
اذكرك بقول المصطفى صلى الله عليه وسلم
من اسخط الله فى رضى الناس سخط الله عليه واسخط عليه من ارضاه فى سخطه ، ومن ارضى الله فى سخط الناس رضى الله عنه وارضا عنه من اسخطه فى رضاه

سيدى القاضى ، العدل العدل
سيدى ، اياك والظلم فالظلم ظلمات يوم القيامة
سيدى ، البر لا يبلى والذنب لا ينسى والديان لا يموت
افعل ما شئت كما تدين تدان

2-الاخوان المعتقلون

لا ادرى حقيقة ماذا اقول لكم
ولكن يكفيكم ما احرزتم من الاجر والمثوبة والمغفرة
وكفى بها
فهنيئاً لكم

آبائى واساتذتى واخوانى
انتم تاج رؤسنا
وقره اعيننا
ومحل ثقتنا وتأيدنا
بكم نفتخر
بأمثالكم تنصلح الامة

آبائى
إن تصبروا وتتقوا لا يضركم كيدهم شيئا إن الله بما يعملون محيط
تقبل الله منكم جهادكم
ولن يتركم اعمالكم

3-الظالمون

لكم من الله ما تستحقون
:أسوق لكم قول المولى
ولا تحسبن الله غافلا عما يعمل الظالمون
افحسبتم انما خلقناكم عبثاً وانكم الينا لا ترجعون فتعالى الله الملك الحق لا اله الا هو رب العرش الكريم
كلا بل ران على قلوبهم ما كانوا يكسبون ، كلا انهم عن ربهم يومئذ لمحجوبون



Mo3Az

Wednesday, January 30, 2008

اول تــــــــاج




السلام عليكم
ازيكم يا جماعة

التاج دا جالى من عند اخويا محمود صاحب مدونة آلام والام من فترة طويلة بس اتأخرت فيه بسبب الامتحانات وقلت اول ما اخلص اعمله على طول ان شاء الله
وبما ان دا اول تاج يجيلى ف انا كنت فرحان بيه حقيقى . مع انى مش عارف مين اللى سماه كدة وليه :)

والان مع الاستاذ تــــــاج : )

-- -- ---------------



لو قالولك اختار عصر من عصور مصر علشان تعيش فيه تختار اى عصر و فى عهد اى حاكم ؟
الحقيقة نفسى اعيش فى اى عصر تكون امتنا فيه فى عزة ونصر ، يعنى نفسى اعيش فى عصر صلاح الدين الايوبى او عصر الدولة العثمانية لما كانت قوية وتذود عن الاسلام والمسلمين . انا بحب الدولة العثمانية جداً


اول اولويه فى حياتك عيلتك ولا شغلك ولا اصحابك ؟
فى التلاتة دول عيلتى


ايه اكتر حاجه بتحبها فى رمضان ؟
الروح الايمانية العالية بوجه عام ، امتلاء المساجد ، اللمة على السحور والفطار ، وقت ما بعد صلاة التراويح لما الشوراع تبدأ تمتلىْ شوية شوية


اوصف ليا اجمل فطار ممكن تفطره ؟
لما يكون الببيت كله موجود ، قصدى ان اخواتى كلهم يكونوا موجودين مش مسافرين وبعدين نقعد كلنا مع بعض بعد الفطار وألعب مع ولاد اخواتى وننزل نصلى سوا . بحس بمتعة غير طبيعية فى الوقت دا


لو انت حاكم على مجموعه من الافراد هتكون عادل ؟طب هتعمل ايه عشان تتأكد انك حاكم عادل ؟
اكيد اتمنى انى اكون عادل ، اعتقد اه ان شاء الله . بيتهيألى ان الشورى هى حجر الزاوية فى الموضوع ولذلك هطبق الشورى معاهم .


اللى بيبوظ الحكام .. نفسهم؟ ولا الشعب؟ ولا الحاشيه المقربه ؟
الحكام لما يكون الشيطان ضاحك عليهم ، والحاشية المقربة لما تكون فاسده ، والشعب لما يكون سلبى


مين أكتر اعلامي مصري بتحترمه ؟
احمد منصور . بحس انه مجتهد اوى فى عمله و هو بصراحة مهنياً متميز


قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه ؟
ما اعرفوش والله يا باشا


لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه ؟
لسه ما اشتغلتش
بس انا بحب مجالى اوى واعتقد انى لو رجع بيا الزمن هختار نفس المجال


ايه تانى بلد تتمنى تعيش فيها بعد مصر ؟
بحب تركيا جداً


اوصف ليا ترتيبات اجمل فرح ممكن تحضره ؟
اولا يكون ما فيهوش حاجة تغضب ربنا . يكون بسيط من غير تكلف . ويكون قعده عائليه اخوية ظريفة يملأها الود . واكيد الحاجة الساقعة والجاتوه حاجة مهمة :)


بتراعي كلام الناس والقيل والقال ؟لو اه او لو لا قول لى ليه ؟
ايوه . واعتقد زيادة عن اللزوم شوية وبحاول اعالج النقطة دى فى نفسى
اصل الشىء لما يزيد عن حده يتقلب ضده


صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد ؟
اوى جدا خاااالص :) . ممكن اتعب شوية بس سريعاً ما اتقألم


السعاده هى ؟
القرب من الله . الرضا بما قسمه الله . حب الناس . النجاح فى العمل . الزوجه الصالحة . الابناء البرره


عندك أمل ؟ أسبابك ؟
كبير الحمد لله . اعتقد ان الله لن يضيعنى


لما تحب تهرب من كل شئ بتروح فين ؟
عند البحر او النيل


امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت ؟
فى يوم ميلادى الاخير لما تميت 20 سنه بحالهم



لما بتعمل عمل خيرى بيكون ايه هو دافعك الاول ؟
نسأل الله الاخلاص


بتشرب سجاير ؟ لو الاجابه اه ايه شعورك لو شفت ست بتشرب سجاير ؟ وليه ؟
. الحمد لله لأ


بتعرف ايدك اليمين من الشمال ازاي ؟
ايه السؤال الغريب دا :) . زى الناس


ايه اكتر اله موسيقيه بتحبها ؟
حقيقى مش عارف . بحب الموسيقى الهادية بس ما عنديش خبره بالالات الموسيقية


فى رأيك ليه الذوق والنخوه اتعدموا ؟
اعتقد انهم لم ينعدموا . ممكن يكونوا قلوا شوية والسبب هو الفهم الخاطىء للاسلام . قال رسول الله (ص) : " انما بعثت لاتمم مكارم الاخلاق " . اهتمام كثير من الناس بالمظاهر الكدابة .


الحاجه اللى لو حصلتلك تبقى سعيد قوى ؟
لو ربنا رزقنى بالشغل فى المجال اللى بحبه ويوفقنى فيه. ويرزقنى بالزوجة الصالحة . وانى اقدر اعمل حاجة مميزة وجديدة تخدم الاسلام والمسلمين .


تختار يبقى عندك ... ارض زراعيه ولا اجنس عربيات و لا كام عماره و لا فلوس فى البنك ؟
ذلك فضل الله يؤتيه من يشاء


البحر ولا النيل ؟
ساعات ساعات


مركب ولا طياره ؟
المركب


مجنون و لا عاقل ؟
عاقل


تقرأ كتاب ولا تتفرج على فيلم ؟
تعتمد على نوع الفيلم وموضوع الكتاب


تمرر التاج لمين ؟


مستر احمد رفعت صاحب قضية عم احمد ---- المهندس عيـــــاش


معلش باه طولت عليكم
وطبعا اى حد عايز التاج يتفضل وانا بجد اكون سعيد لما اشوف اجابات الناس على التاج دا
وبس كدة :)


Mo3Az

Tuesday, January 22, 2008

غزة فى ظلام ... والمسلمون نيام



بسم الله الرحمن الرحيم

"ولنبلونكم بشىء من الخوف والجوع ونقص من الاموال والانفس والثمرات وبشر الصابرين ، الذين اذا اصابتهم مصيبة قالوا انا لله وانا اليه راجعون اولئك عليهم صلوات من ربهم ورحمة واولئك هم المهتدون"

يعيش ااخوانا فى غزة وضع مأساوى الى ابعد الحدود ، فالعالم كله يحاربهم بدايه من الصهاينة المحتلين والعملاء الخائنين مروراً بالدول العربيه والاسلامية .
كنا اتكلمنا عن اتفاقية شنجن فى اوروبا والتى تقتضى فتح الحدود بين الدول الاوروبية
اما فى بلادنا... يحاصر اليهود غزة من ناحية ، ومصر تغلق المعبر من ناحية

انا بجد مستغرب جدا من الوضع الغريب دا ، الناس عندهم ازمة غذائية ودوائية حاده وتم وقف امدادات الوقود الازم لتشغييل محطات توليد الكهرباء والاطفال فى الحضانات معرضين للموت بعد قطع الكهرباء،المخابز متوقفة عن العمل بعد النقص الشديد فى الدقيق..... بوجه عام الحياه شبه متوقفة فعلاً هناك

والمعبر مصرى - فلسطينى خااااااالص لا دخل لليهود فيه والحكومة الفلسطينة الشرعيه تطالب مصر بتحمل مسؤليتها تجاه فلسطين وتفتح المعبر وبرده المعبر مقفول !

ألهذه الدرجة اصبحنا لا نملك قرارنا
!حتى المعبر لا نستطيع فتحه؟؟
واصبحنا نتنظر الاوامر من ابناء القردة والخنازير
حقاً ... لما تناسَوا دينهم ذلهم شر البرية

لا والاغرب من كدة ان لما حصلت فعاليات تضامناً مع الغزاويين تطالب بمساعدة اخوانا فى غزة وتحمل المسؤليه تجاههم تم اعتقال المشاركين فى هذه الفعاليات من قبل السلطات المصرية وعلى رأس المعتقلين الدكتور/ ابراهيم الزعفرانى نقيب الاطباء بالاسكندرية ورئيس لجنه الاغاثة باتحاد الاطباء العرب وصاحب مدونة ذاكرة الزعفرانى

حسبى الله ونعم الوكيل



------------------------------------

نسأل الله ان يفك الكرب
وان يكشف الغمه
ويقر اعيننا بنصرة وعزة امتنا

--------------------------------

تحديث


قام بعض النشطاء الفلسطينيين من شباب غزة فجر اليوم الاربعاء 23/1 بتفجير الجدار الحدودى الفاصل بين رفح المصرية والفلسطينية والذى كان قد بناه الاحتلال الصهيونى قبل الانسحاب من غزة

واحقاقاَ للحق فانه يحسب للحكومة المصرية انها سمحت لاخوانا فى غزة بالدخول الى الاراضى المصرية دون اى مضايقات لشراء ما يلزمهم من غذاء ودواء وكذلك علاج المرضى ، لا ادرى حقيقة هل ذلك التصرف من الحكومة المصرية يأتى رداً على تصريحات ايهود أولمرت ووزيرة خارجيته الغير مسئوله واستمراراً فى مسلسل التوتر منذ عبور الحجاج الفلسطينيين ، ام انه حقا احساس بمعاناه الشعب الفلسطينى

اللى مخلينى اقول كدة ان المسيرة السلمية التى قامت بها الحركة النسوية الفلسطينية التابعة لحركة المقاومة الاسلامية حماس بالامس قوبلت بعنف شديد وتم ارجاع هؤلاء النسوة الى غزة بالقوة ولكن اليوم لا يوجد اى تدخل امنى ضد هؤلاء العابرين وكذلك قمع المتظاهرين فى وسط القاهرة اليوم تضامناً مع اخوانهم فى غزة بل واعتقال المئات منهم ايضاً.
اياً كان ما يحدث وراء الكواليس ، ولكنها خطوة جيدة تعيد الحياه ولو بشكل نسبى للقطاع وتعيد الامل فى غد افضل ان شاء الله .... نسأل الله ان يفك الكرب



Mo3Az

 

Counter From POQbum .com