كم انت كبير يا ابن الصحراء

كنت اتسكع فى طرقات الانترنت :) ، فقادتنى كيبوردى وماوسى الى ذلك الفيديو من يوتيوب
فيديو لحبيب قلبى زيزو بتعليق الرائع عصام الشوالى
فتذكرت بعض المشاعر التى اكنها لذلك المايسترو
واستحضرت
اجتهاده
مهارته الغير مسبوقه
اخلاقة المثاليه
مشواره الطويل مع الفن والهندسه والانجازات
واخيراً ، عزة نفسه وكرامته لما ماتيرازى تطاول عليه وعلى شرفه فى نهائى كأس العالم بين فرنسا وايطاليا فضربه زيدان دون الالتفات الى انه فى نهائى ومن غير اى حسابات

حقا كم انت كبير يا ابن الصحراء
:)
ودلوقتى اسيبكوا مع الفيديو

رسالة

غدا 26 فبرايرهو يوم النطق بالحكم فى المحكمة العسكرية

تلك المحكمة الظالمة التى يحاكم فيها العلماء واساتذه الجامعات ورجال الاعمال من الاخوان المسلمين وعلى رأسهم المهندس خيرت الشاطر نائب المرشد العام ، مع العلم ان هؤلاء الشرفاء من الاخوان نالوا حكماً بالبراءة والافراج الفورى من قبل 4 مرات من القضاء المدنى الطبيعى ، ولكن رفض الظالمون كل ما له علاقة بالعدل فامتنعوا عن تنفيذ احكام القضاء واقاموا تلك المحكمة العسكرية الهزليه للنيل من الشرفاء بل وسرقوا اموالهم وشركاتهم وخزنة الاستاذ حسن مالك التى سجلت فى الاحراز ثم اختفت خير دليل

افسدوا ابحاث العالم الدكتور خالد عودة العلمية بعد ان خاف الفريق البحثى العالمى الذى يرأسه الدكتور وغادر مصر بعد اعتقال الدكتور

فاجتمع الحقد الاعمى على كل ناجح مع الحرص على الكرسى ومحاولة ابعاد كل من يحاول الاصلاح

وكأنه قدر مصر منذ القدم ان يسجن كل شريف او مطالب بالاصلاح

فما نسينا قصة سيدنا يوسف ولا سيدنا موسى عليهم السلام

سجن الاول على الرغم من معرفة عزيز مصر بشرفه وطيب اخلاقه ، وهدد الثانى بالسجن ان لم ينتهى عن محاولات الاصلاح المتكررة

على اى حال احب فى هذا اليوم ان اوجه بعض الرساائل الى من يهمه الامر

:الى كل من

1-القاضى

إعلم أن لك موعداً لن تُخلفه وأن لك مع الله وقفة يحاسبك فيها على كل صغيرة وكبيرة

يوم تبدل الارض غير الارض والسماوات وبرزوا لله الواحد القهار

سيدى القاضى ، ان كنت تنوى ان تبيع اخرتك ارضاء لرئيسك

اذكرك بقول المصطفى صلى الله عليه وسلم
من اسخط الله فى رضى الناس سخط الله عليه واسخط عليه من ارضاه فى سخطه ، ومن ارضى الله فى سخط الناس رضى الله عنه وارضا عنه من اسخطه فى رضاه

سيدى القاضى ، العدل العدل

سيدى ، اياك والظلم فالظلم ظلمات يوم القيامة

سيدى ، البر لا يبلى والذنب لا ينسى والديان لا يموت

افعل ما شئت كما تدين تدان

2-الاخوان المعتقلون

لا ادرى حقيقة ماذا اقول لكم

ولكن يكفيكم ما احرزتم من الاجر والمثوبة والمغفرة

وكفى بها

فهنيئاً لكم

آبائى واساتذتى واخوانى

انتم تاج رؤسنا

وقره اعيننا

ومحل ثقتنا وتأيدنا

بكم نفتخر

بأمثالكم تنصلح الامة

آبائى

إن تصبروا وتتقوا لا يضركم كيدهم شيئا إن الله بما يعملون محيط

تقبل الله منكم جهادكم

ولن يتركم اعمالكم

3-الظالمون

لكم من الله ما تستحقون

:أسوق لكم قول المولى
ولا تحسبن الله غافلا عما يعمل الظالمون
افحسبتم انما خلقناكم عبثاً وانكم الينا لا ترجعون فتعالى الله الملك الحق لا اله الا هو رب العرش الكريم

كلا بل ران على قلوبهم ما كانوا يكسبون ، كلا انهم عن ربهم يومئذ لمحجوبون

Mo3Az

اول تــــــــاج

السلام عليكم
ازيكم يا جماعة

التاج دا جالى من عند اخويا محمود صاحب مدونة آلام والام من فترة طويلة بس اتأخرت فيه بسبب الامتحانات وقلت اول ما اخلص اعمله على طول ان شاء الله
وبما ان دا اول تاج يجيلى ف انا كنت فرحان بيه حقيقى . مع انى مش عارف مين اللى سماه كدة وليه :)

والان مع الاستاذ تــــــاج : )

-- -- ---------------

لو قالولك اختار عصر من عصور مصر علشان تعيش فيه تختار اى عصر و فى عهد اى حاكم ؟

الحقيقة نفسى اعيش فى اى عصر تكون امتنا فيه فى عزة ونصر ، يعنى نفسى اعيش فى عصر صلاح الدين الايوبى او عصر الدولة العثمانية لما كانت قوية وتذود عن الاسلام والمسلمين . انا بحب الدولة العثمانية جداً

اول اولويه فى حياتك عيلتك ولا شغلك ولا اصحابك ؟

فى التلاتة دول عيلتى

ايه اكتر حاجه بتحبها فى رمضان ؟

الروح الايمانية العالية بوجه عام ، امتلاء المساجد ، اللمة على السحور والفطار ، وقت ما بعد صلاة التراويح لما الشوراع تبدأ تمتلىْ شوية شوية

اوصف ليا اجمل فطار ممكن تفطره ؟

لما يكون الببيت كله موجود ، قصدى ان اخواتى كلهم يكونوا موجودين مش مسافرين وبعدين نقعد كلنا مع بعض بعد الفطار وألعب مع ولاد اخواتى وننزل نصلى سوا . بحس بمتعة غير طبيعية فى الوقت دا

لو انت حاكم على مجموعه من الافراد هتكون عادل ؟طب هتعمل ايه عشان تتأكد انك حاكم عادل ؟
اكيد اتمنى انى اكون عادل ، اعتقد اه ان شاء الله . بيتهيألى ان الشورى هى حجر الزاوية فى الموضوع ولذلك هطبق الشورى معاهم .

اللى بيبوظ الحكام .. نفسهم؟ ولا الشعب؟ ولا الحاشيه المقربه ؟

الحكام لما يكون الشيطان ضاحك عليهم ، والحاشية المقربة لما تكون فاسده ، والشعب لما يكون سلبى

مين أكتر اعلامي مصري بتحترمه ؟

احمد منصور . بحس انه مجتهد اوى فى عمله و هو بصراحة مهنياً متميز

قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه ؟
ما اعرفوش والله يا باشا

لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه ؟

لسه ما اشتغلتش
بس انا بحب مجالى اوى واعتقد انى لو رجع بيا الزمن هختار نفس المجال

ايه تانى بلد تتمنى تعيش فيها بعد مصر ؟

بحب تركيا جداً

اوصف ليا ترتيبات اجمل فرح ممكن تحضره ؟

اولا يكون ما فيهوش حاجة تغضب ربنا . يكون بسيط من غير تكلف . ويكون قعده عائليه اخوية ظريفة يملأها الود . واكيد الحاجة الساقعة والجاتوه حاجة مهمة :)

بتراعي كلام الناس والقيل والقال ؟لو اه او لو لا قول لى ليه ؟

ايوه . واعتقد زيادة عن اللزوم شوية وبحاول اعالج النقطة دى فى نفسى

اصل الشىء لما يزيد عن حده يتقلب ضده

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد ؟

اوى جدا خاااالص :) . ممكن اتعب شوية بس سريعاً ما اتقألم

السعاده هى ؟

القرب من الله . الرضا بما قسمه الله . حب الناس . النجاح فى العمل . الزوجه الصالحة . الابناء البرره

عندك أمل ؟ أسبابك ؟

كبير الحمد لله . اعتقد ان الله لن يضيعنى

لما تحب تهرب من كل شئ بتروح فين ؟

عند البحر او النيل

امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت ؟
فى يوم ميلادى الاخير لما تميت 20 سنه بحالهم

لما بتعمل عمل خيرى بيكون ايه هو دافعك الاول ؟

نسأل الله الاخلاص

بتشرب سجاير ؟ لو الاجابه اه ايه شعورك لو شفت ست بتشرب سجاير ؟ وليه ؟

. الحمد لله لأ

بتعرف ايدك اليمين من الشمال ازاي ؟

ايه السؤال الغريب دا :) . زى الناس

ايه اكتر اله موسيقيه بتحبها ؟

حقيقى مش عارف . بحب الموسيقى الهادية بس ما عنديش خبره بالالات الموسيقية

فى رأيك ليه الذوق والنخوه اتعدموا ؟

اعتقد انهم لم ينعدموا . ممكن يكونوا قلوا شوية والسبب هو الفهم الخاطىء للاسلام . قال رسول الله (ص) : " انما بعثت لاتمم مكارم الاخلاق " . اهتمام كثير من الناس بالمظاهر الكدابة .

الحاجه اللى لو حصلتلك تبقى سعيد قوى ؟

لو ربنا رزقنى بالشغل فى المجال اللى بحبه ويوفقنى فيه. ويرزقنى بالزوجة الصالحة . وانى اقدر اعمل حاجة مميزة وجديدة تخدم الاسلام والمسلمين .

تختار يبقى عندك ... ارض زراعيه ولا اجنس عربيات و لا كام عماره و لا فلوس فى البنك ؟

ذلك فضل الله يؤتيه من يشاء

البحر ولا النيل ؟
ساعات ساعات

مركب ولا طياره ؟
المركب

مجنون و لا عاقل ؟

عاقل

تقرأ كتاب ولا تتفرج على فيلم ؟
تعتمد على نوع الفيلم وموضوع الكتاب

تمرر التاج لمين ؟

مستر احمد رفعت صاحب قضية عم احمد ---- المهندس عيـــــاش

feelings ---- الفجــــــرية ---- كراكيب فزلوكــــة

الحياه لحظة ---- الشاب الشنكوتى ---- طوق الحرية

klmat ----- العظماء ---- ولاد النهارده

عاشقة الوطن ---- والقادم اجمل ---- mohamed

احمد الصباغ ---- عيون امير القلوب ----- ftataljanna

معلش باه طولت عليكم

وطبعا اى حد عايز التاج يتفضل وانا بجد اكون سعيد لما اشوف اجابات الناس على التاج دا

وبس كدة :)

Mo3Az

غزة فى ظلام ... والمسلمون نيام

بسم الله الرحمن الرحيم

"ولنبلونكم بشىء من الخوف والجوع ونقص من الاموال والانفس والثمرات وبشر الصابرين ، الذين اذا اصابتهم مصيبة قالوا انا لله وانا اليه راجعون اولئك عليهم صلوات من ربهم ورحمة واولئك هم المهتدون"

يعيش ااخوانا فى غزة وضع مأساوى الى ابعد الحدود ، فالعالم كله يحاربهم بدايه من الصهاينة المحتلين والعملاء الخائنين مروراً بالدول العربيه والاسلامية .

كنا اتكلمنا عن اتفاقية شنجن فى اوروبا والتى تقتضى فتح الحدود بين الدول الاوروبية

اما فى بلادنا... يحاصر اليهود غزة من ناحية ، ومصر تغلق المعبر من ناحية

انا بجد مستغرب جدا من الوضع الغريب دا ، الناس عندهم ازمة غذائية ودوائية حاده وتم وقف امدادات الوقود الازم لتشغييل محطات توليد الكهرباء والاطفال فى الحضانات معرضين للموت بعد قطع الكهرباء،المخابز متوقفة عن العمل بعد النقص الشديد فى الدقيق..... بوجه عام الحياه شبه متوقفة فعلاً هناك

والمعبر مصرى - فلسطينى خااااااالص لا دخل لليهود فيه والحكومة الفلسطينة الشرعيه تطالب مصر بتحمل مسؤليتها تجاه فلسطين وتفتح المعبر وبرده المعبر مقفول !

ألهذه الدرجة اصبحنا لا نملك قرارنا
!حتى المعبر لا نستطيع فتحه؟؟
واصبحنا نتنظر الاوامر من ابناء القردة والخنازير
حقاً ... لما تناسَوا دينهم ذلهم شر البرية

لا والاغرب من كدة ان لما حصلت فعاليات تضامناً مع الغزاويين تطالب بمساعدة اخوانا فى غزة وتحمل المسؤليه تجاههم تم اعتقال المشاركين فى هذه الفعاليات من قبل السلطات المصرية وعلى رأس المعتقلين الدكتور/ ابراهيم الزعفرانى نقيب الاطباء بالاسكندرية ورئيس لجنه الاغاثة باتحاد الاطباء العرب وصاحب مدونة ذاكرة الزعفرانى

حسبى الله ونعم الوكيل

------------------------------------

نسأل الله ان يفك الكرب
وان يكشف الغمه
ويقر اعيننا بنصرة وعزة امتنا

--------------------------------

تحديث

قام بعض النشطاء الفلسطينيين من شباب غزة فجر اليوم الاربعاء 23/1 بتفجير الجدار الحدودى الفاصل بين رفح المصرية والفلسطينية والذى كان قد بناه الاحتلال الصهيونى قبل الانسحاب من غزة

واحقاقاَ للحق فانه يحسب للحكومة المصرية انها سمحت لاخوانا فى غزة بالدخول الى الاراضى المصرية دون اى مضايقات لشراء ما يلزمهم من غذاء ودواء وكذلك علاج المرضى ، لا ادرى حقيقة هل ذلك التصرف من الحكومة المصرية يأتى رداً على تصريحات ايهود أولمرت ووزيرة خارجيته الغير مسئوله واستمراراً فى مسلسل التوتر منذ عبور الحجاج الفلسطينيين ، ام انه حقا احساس بمعاناه الشعب الفلسطينى

اللى مخلينى اقول كدة ان المسيرة السلمية التى قامت بها الحركة النسوية الفلسطينية التابعة لحركة المقاومة الاسلامية حماس بالامس قوبلت بعنف شديد وتم ارجاع هؤلاء النسوة الى غزة بالقوة ولكن اليوم لا يوجد اى تدخل امنى ضد هؤلاء العابرين وكذلك قمع المتظاهرين فى وسط القاهرة اليوم تضامناً مع اخوانهم فى غزة بل واعتقال المئات منهم ايضاً.

اياً كان ما يحدث وراء الكواليس ، ولكنها خطوة جيدة تعيد الحياه ولو بشكل نسبى للقطاع وتعيد الامل فى غد افضل ان شاء الله .... نسأل الله ان يفك الكرب

Mo3Az

...... يا امة المليار

السلام عليكم
ازيكم يا جماعة
كل عام وانتم بخير ويارب دايماً فى صحة وسعادة


كنت قد وعدت بوقف الكتابة فى المدونة الى ما بعد انتهاء الامتحانات
ولكن لم اتمالك نفسى بعد قراءة هذا الخبر فقررت الكتابة

-------------------------------

استيقظت فجراً استعداداً لبدء يوم جديد استعداداً للامتحانات وعقلى مشغول بكيفية تنظيم اليوم وهزاكر ايه الاول
وبعد ان صليت الفجر جلست امام الكومبيوتر للاطلاع على جديد الاخبار قبل المزاكرة كالعادة

فوجدت ما اثار فى نفسى شجون غير طبيعى

جمع من سكان بولندا يقفون امام احدى نقاط الحدود بين بولندا والمانيا فى لحظات ما قبل فتحها

فقد قرر الاتحاد الاوروبى توسيع ما يسمى بفضاء شنجن ليشمل 24 دولة اوروبية

فمن منتصف الليلة الماضية اصبحت هذه ال 24 دولة فى الاتحاد الاوروبى كياناً واحداً

فبعد توحيد العملة
هاهم يفتحون الحدود تماماً والانتقال من بلد الى اخر يتم بالبطاقة فقط دون الحاجة الى جواز السفر
حتى تكتمل الوحدة
والمواطنون يحتفلون بهذا الحدث العظيم

تبادر الى ذهنى بسرعة
طب واحنا ؟؟

فرأيت خبراً اخر فى نفس الموقع يفيد بان اخوانا فى العراق انقسموا ازاء الاحتفال بعيد الاضحى المبارك
فالسنه احتفلوا به فعلا بدءاً من يوم الاربعاء
اما الشيعة فيبدأ العيد عندهم اليوم الجمعة

ناهيك عن الخصومات السياسية المشهورة بين بعض الدول العربية والاسلامية وما حرب الخليج عنا ببعيد
وهالنى ان اعرف ان الحدود بين المغرب والجزائر مغلقة منذ امد طويل


فشعرت بحنين غير طبيعى لسماع النشيد المحبب
يا امة المليار

يا امة المليار هايشق الليل نهار
ويعيد لنا ارضنا ويرجع اللى إنهار

فخرجت الى البلكونة فوجدت الجو بارد جدا والسماء بها غيوم كثيفة
وشردت قليلا
...... فلسطين-العراق-افغانستان-باكستان-لبنان -الصومال-حتى احنا كمان

... فاشتقت الى تلك الايام

.... ايام الناصر وخالد

.... ايام الفاتح

: فوجدت النشيد يقول

من الفرقة الكل ضل
فى البعد ذقنا الذل
وعشان وحدة شعوبنا
اسلامنا هو الحل

مش عارف الحقيقة اهنى اخوانا الاوربيون
ولا اقولهم ان الالة الاستعمارية بتاعتكم زمان فرضت القيود علينا وها انتم الان ترفعوا القيود من عندكم
مش عارف اقول ايه
فقولت يارب
: فوجدت النشيد يقول مرة اخرى

يا امة المليار هايشق الليل نهار
ويعيد لنا ارضنا ويرجع اللى إنهار

فقلت يااااااارب

اسأل الله ان يستخدمنا ولا يستبدلنا
وان يعجل لنا بفجر جديد
ويقر اعيننا بوحده امتنا
ونهضة وعزة بلادنا
-----------------
كان هذا بعض مما شعرت به بعد قراءة الخبر
الساعة دلوقتى 8 و ربع والمفروض ان الريست خلص
والمفروض اقوم عشان اكمل
ادعولى يا جماعة بالله عليكم

ونتقابل بعد الامتحانات ان شاء الله
:)


Mo3Az